Jarduerak 2007

Durangoko udalbatzarreari aurkeztutako oroitarri-egitasmoa (2007-11-12)

Herriaren askatasunaren alde, frankismoaren aurka, euren bizitza eman zuten durangarrei oroigarria eraikitzeko proposamena

Helburua

Oroigarriaren eraiketaren helburua frankismoak eragindako hildako durangar guztiei gorazarre egitea da, hau da, herriaren askatasunaren alde euren bizitza eskaini zuten guztiei, eta gerrate zibilaren garaian edo horren ondorioz hil ziren, hil zituzten, desagertu ziren eta desagerrarazi zituzten guztiei.

Oroigarriak ez du hildako edo desagertutako inoren izenik izango, eta ez du inolako talderen ikurrik erakutsiko. Anitza eta akonfesionala izango da, guztiak batzeko modukoa, eta inskripzio soila baino ez du izango, honelako zerbait adieraziko duena: ‘Herriaren askatasunaren alde, frankismoaren aurka, euren bizitza eman zuten durangarrei. Durangarrok, 2008-11-09”.

Non jarri

Oroigarria jarriko den tokiak beraren itxura baldintzatzen du eta, beraz, zein izango den lehenbailehen zehaztea guztiz beharrezkoa da.

Alkateak berarekin maiatzean izandako elkarrizketan toki bi eskaini zizkigun: Zuhatzola parkea (bertan epe laburrean jartzeko moduan) eta Ezkurdi ondoko parke berrian (epe ertainean jartzeko eran). Gure elkarteak beste egongune bat proposatzen du: Kurutziaga, egokiena begitantzen zaigulako (nolabait, garai horretako gune esanguratsua delako).

Edozelan ere, egongunea zehaztea eman beharreko lehenetako urratsa da, oroigarriak izango duen tokiak beraren ezaugarriak mugatzen dituelako neurri handian.

Zelan egin

Proiektua Debako Arte Eskolak egingo luke, eta pertsona-egilerik ez luke izango, hots, ez luke artegilearen izenak oroigarria sinatuko. Debako Arte Eskolak ikasleekin dituen ohiko prozedurak jarraituz egingo luke proiektua.

Oroigarriaren ezaugarriak

Oraingoz oroigarri zehatza proposatzen ez den arren, jartzeko tokia zehaztu arte ezina delako, oroigarriaren zenbait ezaugarri aurreratu egiten dira:

-harriaz (kareharria, haitzetako harria) eta burdinaz egina izango litzateke (harriak Durango/Durangaldea garai mugagabean irudikatuko luke, une zehatz batetik gaindik, eta budinak garai zehatz horretako Durango behargin eta industriala);

-harriak, ingurura egokitua, tamaina emango lioke oroigarriari;

-burdinak ezaugarri berezia eta bitxia emango lioke garai horretako gizartearekin lotuz; gainera burdina Saibigain borroka-tokian batutakoa litzateke, neurri batean behintzat;

-lehenago aurreratu den legez, inskripzio bakarra izango luke (‘Herriaren askatasunaren alde, frankismoaren aurka, euren bizitza eman zuten durangarrei. Durangarrok, 2008-11-09”), beste inolako ikurrik edo inskripzio barik, artistikoak izan ezik, noski.

Egitasmoaren aurrekontua

Egitasmoaren aurrekontua 50.000 eurokoa izango litzateke, gutxi gorabehera. Berau zehazteko kontuan hartu dira oroigarriaren tamaina, materialak, Debako Arte Eskolak egindako lana eta kokatzeak ekarriko lituzkeenak. Egitasmoa aurrera doan neurrian, aurrekontu zehatzagoa egin beharko litzateke.

Egitasmoaren kudeaketa

Oroigarriaren eraiketaren urrats guztiak kudeatzeko batzorde berezia sortuko litzateke, Durangoko udalbatzarrak eta Durango 1936 kultur elkarteak izendatua.

Batzorde horrek oroigarriaren tokia eta beraren ezaugarri orokorrak (bolumena eta materialak) mugatuko dituen egitasmo zehatzagoa egingo luke, eta Debako Arte Eskolarekiko harremanak koordinatu eta zuzendu.

Durangon, 2007ko azaroaren 12an

Durango 1936 kultur elkartea