Aurkezpena

Durango 1936 kultur elkartea 2007ko martxoaren 31an sortu zela esan daiteke. Egun horretan hasi ginen askatasunaren alde borrokatzearren fusilatutako eta desagerraraziko hainbat durangarren senide batzen.

Ekainean idazkia zuzendu genion Durangoko Alkateari (ikus web orri honetan jarduerak atalean), eta elkarrizketa eskatu genion. Elkarrizketan askatasunaren alde euren bizitza borrokan eman zuten durangarrak omentzeko oroigarria eraikitzea eskatu genion, eta garai hartako idazkiak eta agiriak biltzeko ikerketa egitea ere bai. Alkateak egitasmoak egiteko eta aurkezteko esan zigun.

Udan eta udazkenean zehar, senide gehiagorekin bildu ondoren, hiru zeregini lotu gintzaizkion: elkartea eta egitasmo biak egitea. 

Elkartea egiteko estatutuak idatzi genituen (ikus web orri honetan), izena asmatu eta legeztatzeari ekin genion azaroaren 4ean. Era berean egitasmoak idatzi genituen (ikus egitasmook ekintzak izeneko atalean), eta Alkateari helarazi.

Azaroan eta abenduan zehar egitasmo biak, eta bide batez elkartea, Durangoko alkateari eta zinegotziei, eta zenbait alderdi zein elkarteri aurkeztu diegu. Orain ere horretan dihardugu. Horiez gain, 2008ko ekintzak prestatzen ari gara eta web orri hau egiten. 

Durango 1936 kultur elkartearen helburu nagusia askatasunaren eta herriaren alde frankismoaren aurka euren bizitza eskaini zuten durangarrak eta durangaldekoak omentzea eta ohoratzea da. Euren berri izan eta herrian zabaldu nahi dugu. Baina hori guzti hori zuen laguntzarekin baino ezingo dugu egin.